#PE-ARM-2026-C707

Արագածոտնի մարզի Բերքառատ գյուղի դպրոցը վերածվել է իշխող ուժի քարոզչական հարթակի։ Մայիսի 13-ին դպրոցի ուսուցիչներին «Գազելներով» տեղափոխել են Ապարան՝ «Քաղաքացիական պայմանագիր» կուսակցության նախընտրական քարոզարշավին մասնակցելու նպատակով։ Ընդ որում՝ ուսուցիչներից երկուսն ընդունել են, որ «հանուն Փաշինյանի» կրճատել են դասաժամերը։ Ուսուցչուհի Վարդիթեր Գրիգորյանի խոսքով՝ դպրոցի տնօրեն Աննա Վարդանյանի գլխավորությամբ ուսուցիչները նախապես էին պատրաստվել մասնակցել քարոզարշավին, իսկ աշակերտներին տուն են ուղարկել։ Դպրոցը չի կարող ծառայել որևէ կուսակցության քարոզչական շահերին։ Հանրային կրթական հաստատությունների բնականոն գործունեության խաթարումը և աշխատակիցների ներգրավումը քաղաքական միջոցառումների մեջ հակասում են ընտրական օրենսգրքին, հանրային ծառայության և կրթության քաղաքական չեզոքության հիմնարար սկզբունքներին։ Առավել մտահոգիչ է, որ, ըստ տեղեկությունների, Ապարան համայնքի այլ դպրոցների՝ մասնավորապես Արագած և Քուչակ գյուղերի ուսուցիչներն ու աշակերտները ևս դասաժամերի ընթացքում ներգրավվել են իշխող կուսակցության քարոզչությանը։ Այս փաստերը վկայում են համակարգային բնույթ կրող վարչական ռեսուրսի օգտագործման մասին: Տեսանյութի հղում`https://www.youtube.com/watch?v=OrcaFPhNHlg